Ranggas dan kemunting - Melissa Francis

enda nyangka nuan berani
ngelawa aku atas panggau
nyua ka kayu siti
dibalut perecha mansau

udah nya lalu ku buka
mata nuan nyeling nyeling
tekenyit aku tepeda
kayu ranggas dan kemunting

udah bekau kena jeling
ati aku tepelintang
maya aku ka merening
nuan nungga ke belakang

aku lalu tebelengga
pengudah ati di regau
kada enda kayu di sua
bebali nyadi jayau...

kenyau ari nya ati aku
enggai badu ngenang
merampau enda ngetu
beraie ngiga kemayang

nyabak siang enggau nyabak malam
betatie ke nuan mata enggai pejam
nyawa enggai dipansal nelan
laban ngenang nuan selalu
ati enggai nyadi di kuing
udah megai ranggas kayu dan kemunting

dasuh ku gama manang
mina di unsut ia sakang
dasuh ku tenggau beliau
mina sepu ia enggau puchau

bai aku ngagai ke klinik
tang nadai ga sida ngejik
minta ubat ba Lutor
mina di beri ia Panadol

belian bebunuh buyu
piring nadai ga ditegu
ditimang ngena lemambang
nadai ga antu nunang

dalam mimpi aku betanya
ba aki bungai Nuing
ia madah ketegal buya
ranggas kayu dan kemunting


@ 02:51:00

• Facebook
• Twitter
• Google+
• Pinterest
• StumbleUpon
• Delicious
• LinkedIn
• Reddit